Wayahini urang bagandang nyiru bacarian nang umpat mandukung pas pamilihan kapala dairah atawa pilkada, Ahad (20/9/2020).
Ujar urang tahun ngini tahun pulitik atawa tahun urang mamilih kapala dairah. Jadi bubuhan nang bacalun kapala dairah bararabutan dudukungan, sabab amun banyak nang mandukung harapannya banyak jua kolehan suara wan manang.
Ibaratnya bubuhan calun kapala dairah wayahini lagi raramiannya bacarian dukungan nangkaya urang bagandang nyiru. Amun bahari urang bagandang nyiru ngitu gasan bacari urang nang hilang, karna dipatak hantu.
Jadi bagandang nyiru ngini sakadar parumpamaan haja gasan nang wayahini bahahar bacarian dukungan. Dadangaran ada nang bagandang nyiru sambil mamutiki fotokopi KTP ka rumah rumah warga.
Kikira haja pang fotokopi KTP ngitu gasan sasarah supaya kawa kolehan dukungan. Imbah ngitu pulang, ujar jua pang, satiap butingan fotokopi KTP ngitu ada ganti pananalinya atawa pangalihnya, supaya kada kasurupan wan bidik banar mancucuk gambar.
Amun haraga nyiru dipasar sakitar talung puluh ribu rupiah, tapi haraga fotokopi KTP ujar habar talarang pada haraga nyiru. Haraga fotokopi KTP ada nang sampai saratus ribu salambar, kalah tu pang haraga nyiru gasan bagandang.