Banyu baah di Kabupatin Banjar sudah 2 pakan kada sing panditan atawa surutan, karna ngitu ada nang guring dirampatai wan batis balancat, Salasa (12/1/2021).
Kada gagampangan bancana nang turun, hujan bilang kada ampihan banyu baah sasain maulah calap rumah wan kartak di babarapa kampung wan kacamatan di Kabupatin Banjar. Sapalihan warga ada nang tapaksa baandah ka wadah kula atawa jiran nang rumahnya kada kacalapan.
Warga nang kada hakun baalih atawa kada baandah karumah kulawarga atawa jiran baulah rampatai di dalam rumah. Rampatai ngini ada gasan maandak pakakas supaya labih tinggi pada banyu di dalam rumah.
“Ulun pakacilai kada umpat baandah ka rumah urang nang ada di kiwa wan kanan, karna sama haja pada calap jua didalam rumah. Supaya kawa guring atawa baduduk kada kacalapan ulun maulah rampatai, nih kikira sa dapa tingginya pada lantai rumah ngini,” ujar Su Anang Husaini di Sungai Tabuk, Salasa (12/1/2021).
Wayahini nang banyak kakanakan wan urang tuha, ujar Su Anang, banyak batis warga nang balancat, karna aur kacalapan di banyu haja saban hari.
“Labih 2 pakan (2 minggu) sudah kami disini kacalapan karna banyu Sungai Martapura maluak kahibakan,” jar Su Anang sambil jabul maisap roko di rampatai bakisahan.
Foto: Bencana Kesehatan