Warga Desa Sungai Batang Kacamatan Martapura Barat Baulah Wan Bajual Karupuk Nasi Kulihannya Malaran Gasan Mahidupi Kaluarga (16/3/2020).
Lantaran pandapatan bahuma kada mayu gasan bamacam-macam kaparluan rumah tangga sahari-harinya, makanya sapalihan warga di Desa Sungai Batang, Kacamatan Martapura Barat, Kabupatin Banjar baulah wan bajualan karupuk gasan manambahi mata pancaharian.
Di Desa Sungai Batang ngini ada sapalihan warganya nang baulah karupuk gumbili atawa upak, ada nang baulah karupuk nasi, wan lainnya. Acil Ida haja umpamanya, sidin salain bahuma batanam banih sambil jua baulah karupuk nasi.
“Sudah parak tangah dua tahun ulun baulah karupuk nasi ngini. Amun pakulihan duitnya malaranai, kawa haja gasan walanja kakanakan wan batatukar pakakas dapur,” ujar sidin.
Acil Ida nang sudah baisian anak 2 ikung ngini mamadahakan jua, dalam sahari kawa maulah 10 bungkus karupuk nasi.
“Baulah karupuk ngini, gawian sasambilan haja, sabab ulun ada jua gawian lain nangkaya bahuma, maurusi anak wan bajualan iwak karing,” kisah sidin.
Imbang ngitu Acil Ida mamadahakan wayahini rahatan musim panghujan. Karna ngitu lambat karing karupuk nang dijamur.
“Biar ngalih manjamur karna rancak hujan, tapi haraga sabungkus karupuk nasi ngini tatap haja 5 ribu rupiah,” ujar Acil Ida.