Sapalihan nang bakabun tapaksa rugi wan dalas buruk di puhun kada manjual buahnya kapasar, sabab haraganya talalu murah lagian pulang katimbang tadua kali rugi,Jumahat (17/7/2020).
Kada sabarataan nang usaha bakabun ngitu kulihan untung. Cuntuhnya, haja bubuhan nang bakabun kara’i atawa bilungka di Desa Abumbun Jaya. Bubuhannya disini sapalihan tapaksa rugi banar, pasalnya pas rahatan buah kawa diputik, tapi haraganya murah banar.
“Kara’i ngini pas lagi murah banar paling larang Rp 1500 sakilonya, amun diputik lalu dijual, talapah mamutik wan mahangkut ka pasar. Jadi kada sasuai banar mun digawi jua, makanya maraha buruk dipuhun, katimbang bahujung lapah wara,” ujar Acil Rawiyah nang biasa bakabun kara’i.
Ujar sidin tumatan mananam sampai buah kara’i atawa bilungka ngitu kawa diputik parlu 40 harian. Tapi mun rahatan buah diputik wan banjir dipasaran, haraganya nangkaya kadada banilai.
“Nah kaya dintu pang kisah bubuhan kami batanaman atawa bakabun bilungka di Sungai Tabuk ngini. Artinya dalas buruk di puhun kada kami putik wan jual ka pasar, sabab tadua kali rugi,” Acil Rawiyah bapadah.
[penci_related_posts title=”Berita Menarik Lainnya Klik Saja Dibawah Ini” number=”6″ style=”grid” align=”none” displayby=”recent_posts” orderby=”random”]