MARTAPURA – Haraga baras lakatan di Banjar dijual buhan padagang talarang pada baras biasa di pasar wan di kampung, Salasa (21/12/2021).
Amun pian biasa mahurup baras atawa manukar baras kikira tahu haja mun haraga baras lakatan larang pada baras biasa. Tapi mun kada tabiasa takajut haraga baras lakatan.
“Mun dahulu baras lakatan tamurah pada baras biasa, karna banyak nang batanam banih lakatan. Imbah ngitu banyak nang kulir batanam lagi,” ujar Rahmat nang biasa bahuma wan batanam banih lakatan di Kabupaten Banjar.
Mun wayahini, jar Rahmat, haraga baras lakatan putih salitar atawa sacuntang Rp 14 ribu. Sadangkan baras biasa nangkaya siam mutiara haraganya Rp 10 ribu haja salitarnya.
“Han talarang baras lakatan kalo wayahini,” sambatnya.
Baras lakatan mun di Banua kita di Kalsel ngini dipakai urang gasan maulah wadai. Misalnya wadai kakicak, hintalu karuang, gagatas, lamang wan wadai nang lainnya.