Kantor Berita Kalimantan
Home ยป Iwak Karing Haruan Bamula Rami Di Pasar
BUDAYA DAERAH EKONOMI

Iwak Karing Haruan Bamula Rami Di Pasar

IMG 20200312 112720
IMG 20200312 112720

Iwak Karing Haruan Bamula Rami wan Banyak Sudah Kaluaran Dijual Urang Di Pasar Pasar Di Banua Kita, Misalnya Haja Di Desa Sungai Batang, Kabupaten Banjar (13/3/2020).

Imbah parak satangah tahun kada kalihatan urang manjual iwak haruan, tapi samingguan ngini sudah ada. Karna kadada atawa halin iwak haruan, di pasaran nang ada iwak tauman haja (Snake Head).

Karna ngitu dalaman satangah tahunan ngini urang nang bajualan katupat atawa nasi kuning iwak tauman haja. Padahal urang banyak nang labih katuju iwak haruan daripada tauman.

IMG 20200312 112854
Iwak Karing Haruan Bajamur di Desa Sungai Batang, Martapura Barat

“Tapaksa ai kami pakai iwak tauman, sanunuhan ada jua iwak haruan haraganya larang banar,” ujar acil siah nang bajualan katupat di Gambut.

BACA :   Pencegahan Penyalahgunaan Narkoba dan Miras di Lapas Anak Martapura

Iwak haruan sudah ada di pasaran ngini talihat pas bamula rami urang manjamur iwak karingnya atawa garih haruan. Misalnya haja Acil Ida di Desa Sungai Batang, Kacamatan Martapura Barat, Kabupatin Banjar, sidin mulai sudah bajualan iwak karing haruan.

“Hanyar samingguan ngini pina ta rami urang maantari iwak haruan ngini,” ujar sidin (13/3/2020).

Acil Ida bapadah, bahwa sidin labih 3 tahun bajualan iwak karing haruan, sapat halus, sapat siam, wan imbahanu iwal puyau. Amun masalah haraga iwak karing haruan wayahini masih talarang, sakilonya Rp 80 ribu.

“Amun samalam haraganya ada nang labih Rp 100 sakilonya,” jar Acil ngini.

Leave a Comment

KANTOR BERITA KALIMANTAN
KBK - Kantor Berita Kalimantan Info Khas Kalimantan
error: Content is protected !!