Martapura – Wayahini didunia media sosial bamacam-macam kalakuan urang supaya talihat babida wan urang lain. Ada nang maulah tulisan nang isinya manyumpahi urang lain, mamfitnah, wan maulah habar nang isinya karamput. Sapalihan ada marasa tasinggung karna sudah katarlaluan lalu baurusan lawan pulisi.
Habar nang paling hanyar , ada urang nang mamakai akun instagram palsu, pakai gambar urang isinya manyumpahi Tuan Guru atawa Ulama nang paling banyak banar murid wan jamaah sidin. Kada sakadar tulisan haja nang mahina wan manyumpahi kada kakaruan, gambar tuan guru wan ulama ngini curiti tulisan kada sanunuh.
Kalakuan urang ngini maulah abut wan banyak nang sarik banar. Rame basambatan basasahutan. Ada nang handak mancarii wan manakuni sapa gerang nang bujur urang nang baisi akun bangaran oktavia_343434.
Manurut habar buhan pulisi matan cyber cop Polres Banjar rahatannya mancarii nang ampunnya akun instagram ngitu. Pulisi jua mamadahi wan bubuhan masyarakat supaya basabar haja, kada lakas tapancing ulih urang nang singhaja handak kakacauan.
Sapalihan banyak warga di banua kita nang manyarik atawa manyangit, sabab gurunya wan ulama dihina wan disambati nang kada bujur.
” Kada baisi parasaan wan pahatiankah, mun guru saurang disumpahi macam ngitu baranai wara, ” ujar Sairi Warga Martapura.
Banyak cara urang handak maulah abut wan maharu-haru di masyarakat. Gasan ngitu kita barataan parlu banar bahati-hati supaya kada lakas tapancing wan langsung haja abut jua, sabab amun kita tapancing,pas banar lawan kahandak urang.