BALIKPAPAN – Jumbatan Pulau Balang nang mahubungakan Kota Panajam Ka Balikpapan di Kaltim tuntung dibangun tadahulu pada Jumbatan Pulau Laut di Kalsel, Ahad (9/1/2022).
Harat jua bubuhan Kaltim kawa jua manuntungakan pambangunan Jumbatan Pulau Balang. Padahal kada gagampangan jumbatan nang dibangun ngitu panjangnya 804 meter.
Info tumatan Kementerian PUPR mamadahakan gasan mambangun atawa maulah Jumbatan Pulau Balang ngitu pakai duit APBN, yaitu Rp1,3 triliun.
Amun Jumbatan Pulau Balang ngitu sudah kawa dipakai, maka parjalanan jadi labih parak palingan 1 jam. Tapi mun wayahini labih jauh mamutar sakitar 80 Km atawa makan waktu sakitar 4 Jam.
Samantara ngitu Pambangunan Jumbatan Pulau Laut nang mahubungakan Batulicin – Tanjung Serdang Kotabaru, Kalsel baluman ada habar pabila tuntungnya. Padahal sudah sakitar 5 tahunan jumbatan nang pacangan mahubungakan Kabupaten Tanah Bumbu lawan Kabupaten Kotabaru ngini mulai batajak tihang.
Ujar habar Jumbatan Pulau Laut pacangan jadi jumbatan nang paling panjang numur 2 di Indonesia, tapi nang pasti panjang banar waktu gasan manuntungakan.