MARTAPURA – Kada kawa manyandang banyaknya diranjah tuyukan kayu wan Paring jumbatan ba’ayun di Desa Pingaran Ilir, Kecamatan Astambul runtuh, Sabtu (15/1/2022).
Banyu ba’ah nang tarjadi di Kecamatan Astambul kiriman tumatan batang banyu (Sungai) Riam Kiwa malarutakan banyak batang kayu wan Paring. Imbah ngitu nang larut di banyu ngini sangkut di jumatan ba’ayun atawa jumbatan bagantung.
Karna kada tahan diranjah banyaknya kayu wan paring, ditambah pulang tunjulan banyu nang daras jumbatan di Desa Pingaran Ilir ngini runtuh.
“Jumbatan ba’ayun ngini runtuh wan rusak banar baisukan tadi kikira jam 6,” ujar Ahmad, warga Desa Pingaran Ilir, Sabtu (15/1/2022).
Ujar pakacil ngini, karna rusak banar jumbatan kada kawa pakai gasan urang manyubarang jadi tapaksa ai ditutup.
“Bubuhan warga desa baharap banar Pemkab Banjar mambaiki jumbatan ba’ayun nang runtuh ngini. Karna jumbatan ngini panting banar gasan buhan warga manyubarang,” jar Ahmad.