Kagusangan atawa kasalukutan subuh tadi Di Desa Benteng Ulu, Marabahan mahangitakan sabuah rumah nang puang, wan 3 ruangan sakulahan SDN Ulu 1, Sabtu (8/8/2020).
Api nang nyarak banar wan manjalung subuh tadi di Desa Benteng Ulu, Kacamatan Marabahan, maulah warga desa takijat – kijat. Ada nang bakuciak api, ada nang mancatuk tihang listrik, wan ada jua nang bakiauan bubuhan pamadam.
Salain ngitu warga nang rumahnya parak lawan rumah gusang ngini basamaan umpat mamajahi api. Ada nang mambawa gayung baisi banyu ,lalu manyimbur rumah nang rahatan banyala, tapi karna apinya nyarak lalu malayap ka sakulahan SDN Benteng Ulu1.
Ujar habar warga desa, api panambayan banyala di rumah puang ampun julak Imran. Kagusangan rumah nang malayap ka sakulahan SD ngini, dibujurakan buhan polisi matan Polsek Marabahan.
Kapolsek Marabahan, IPDA Rahman mamadahakan, panyabab kasalukutan nang maulah 1 rumah wan 3 ruangan sakulahan hangit baluman dikatahui.
“Baluman dikatahui panyabab kagusangan ngini, mun tangguhan samantara, karna ada listrik konslit,” ujar Kapolsek.
Kagusangaan atawa kasalukutan ngini sawat maulah bubuhan warga kiwa wan kanan di Jalan Putri Junjung Buih, Desa Benteng Ulu takipik- kipik, sabab sabahagian rarahatan nyamannya guring lalu bangun bakajutan.