Karna karandahan tali kabal ampun bubuhan Telkom wan kabal gasan indihome tasantuk mutur trak nang lalu lalang, Arba (12/8/2020).
Tali kabal ampun buhan Telkom nang bagantung di Jalan Martapura Lama, Simpang Ampat Sungai Tabuk, Kabupaten Banjar tajuntai imbah santuk mutur trak nang baangkutan. Karna tasantuk tali kabal gasan internet atawa indihome ngini sasain barandah atawa taulur pada kaandakan asalnya.
Utuh (40), nang rumahnya umpat tasantuk tali kabal ngini mamadahakan, bubuhan warga sudah balapor lawan bubuhan Telkom, tapi baluman ada nang mambujurakan.
“Malam tadi kajadiannya, kami rahatan guring lalu hatap seng babunyi nyaring wab rumah bagoyangan. Imbah kami jinguki kaluar, sakalinya tali kabal Telkom ngitu sangkut takait mutur trak,” ujar tukacil ngini, Arba (12/8/2020).
Utuh lawan nang bini baharap bubuhan Telkom salakasnya mambujurakan tali kabal nang tajuntai randah wan sangkut ka hatap seng rumannya.
“Mudahan lakas dibujurakan, kami takutan ada pulang mutur trak nang baangkutan wan tinggi nang santuk lalu umpat mambair rumah kami ngini,” ujar Tukacil Utuh.