Samalam bubuhan kpu parupinsi kalimantan salatan tulakan ka jakarta mambawa buntalan hasil rekapitulasi panghitungan daftar pamilih tetap pamilu 2014 di banua kita. Buntalan ngitu baisi hasil rapat pleno ulang nang digawi 13 kpu kabupaten / kota di banua kita di kalimantan salatan. Anggota kpu provinsi kalimantan salatan nang mambidangi data pamilih nurkholis majid wan rri mamadahakan samalam bubuhannya sudah sampai di kantur kpu pusat di jalan imam bonjol jakarta. Nah imbah sampai disana takumpulan bubuhan kpu sa indonesia nang marapatakan gasan parsiapan panatapan daftar pamilih tetap / dpt hari ini.
Ujar nurkholis di kpu pusat sana bubuhan matan kpu parupinsi kalimantan salatan malihatakan hasil rekapitulasi nang dibawa matan banua langkap basarta barita acaranya. Badasarkan data nang sudah sampai ka kpu kalimantan salatan jar nurkholis majid, maka jumlah pamilih pamilu 2014 kaina dibanua kita sabanyak 2 juta 804 ribu 211 urang pamilih. Jumlah ngitu jarnya sudah diusahakan samaksimal mungkin supaya kadada nang tatinggal atau tadua kali catat ngaran urang nang sama