Mangadang Tantaran Paring Gasan Maunjun Iwak Papuyu Wan Haruan Di Sungai Batang, Kacamatan Martapura Barat, Jumahat (6/8/2021).
Musim maunjun iwak di Banua kita ngini masih rami haja. Karna ngitu masih banyak urang nang tulak Maunjun manuju handil, pahumaan, atawa danau.
Pakakas gasan maujun nang panting banar ujar bubuhan paunjunan, yaitu nang bangaran tantaran (joran). Amun urang Banjar katuju tantaran nang diulah urang tumatan paring (bambu).
Haraga tantaran paring ngini bamacam-macam, mulai haraga Rp 5 ribu sampai ratusan ribu, ada jua nang haraganya sampai jutaan.
Sabaluman jadi tantaran nang baik, paring nang pacangan diulah gasan paunjunan ngitu digadang dahulu di api supaya kawa lurus sasuai kahandak.
Ujar Julak Fahmi di Sungai Batang, Kacamatan Martapura Barat, Kabupaten Banjar, mun mangadang paring kada kawa sambarangan.
“Amun talalu panas paring bisa pacah maladum. Imbah ngitu pulang bahari-hati manurut paring supaya pas lurus wan cagat,” ujar sidin, Jumahat (6/8/2021) baisukan tadi.
Julak Ami (Kiawan sidin) mamadahakan, sidin sabaluman bisa mangadang paring gasan tantaran ngini, 50 buting nang digadang pacah barataan. Tapi imbah balajar 15 tahun lalu wan bubuhan Anjir, sidin sudah bisa.
” Bubuhan Anjir banyak nang ahli manggadang paring gasan tantaran ngini, jadi aku balajar wan buhannya sampai bisa,” kisah sidin.
Upah mangadang ngini bamacam-macam, mulai sapuluh ribu sampai 70 ribu, bagantung lawan panjangnya paring. Amun sakitar ampat atawa lima dapa haja, palingan upahnya Rp 20 ribu.
Dalaman sahari mun bagawian tarus kawa haja manuntungakan sampai 20 butingan mangadang tantaran. Mun masalah haraga tantaran paring nang sudah jadi bagantung panjangnya atawa pilihan.
” Tantaran nang panjang sakitar 5 meteran ngini haraganya Rp 40 ribu. Amun nang pilihan lain lagi haraganya,” jar Julak Fahmi.