BANJARMASIN – Maskot Kota Banjarmasin Patung Bakantan sudah satahunan bakadap jadi kada bungas lagi, karna lampunya pajah wan kada kaluar banyu lagi di muntungnya, Kamis (23/12/2021).
Banyak bubuhan wisatawan datang tumatan luar dairah marasa ada nang kurang di Maskot Kota Banjarmasin Patung Bakantan. Imbah diitihi bujur bujur sakalinya gagara lampunya kada banyala lagi, wan kada lagi banyu nang mancurat tumatan muntung Patung Bakantan ngitu.
“Lampunya sudah lawas kada banyala, pajah bakadap ngini satahunan ada sudah. Kikira pas rahatan mulai rami Corona, lawan pulang lampunya sudah dipaculi jua,” ujar Iman, sopir klotok di muka Patung Bakantan, Kamis (23/12/2021).
Iman mamadahakan jua, banyak wisatawan nang mahual sakaligus manyayangakan kanapa dibiarakan haja bapajahan lampu. Nang asalnya patung bakantan ngini bungas karna ada cahaya habang, hijau, kuning, biru, tapi wayahini kadap lalu.
“Mun kami disini baharap Pak Wali Kota Ibnu Sina mambaikiakan supaya lampu banyalaan disini, tamasuk nang di lurung – lurung kada ngitu. Amun tarang atawa kada kadap lagi, maka bubuhan wisatawan sasain banyak, aman wan nyaman kami bausaha klotok jadi banyak jua panumpangnya,” ujar Iman mamadahakan harapannya.