Martapura : Musim bacari iwak maulah buhan paiwakan wan paunjunan rami turun ka pahumaan wan ka handil basaing manangkapi iwak haruan, papuyu wan iwak sapat.
Wayahini musim buhan paiwakan wan paunjunan. Ada nang ampah kahulu wan kahilir urang mahangkut panangkap iwak, matan unjun sampai ka tampirai. Imbah ngitu bubuhan nang bajualan umpan nangkaya kararawai, anak tabuan, anak kararangga, kodok rami jua mamutiki hujungan.
Mamasuki musim panghujan iwak di danau, sungai, pahumaan wan di handil-handil bamula katungapan. Bubuhan paiwakan wan paunjunan tahu banar ngini, bahwa iwak lagi raramiannya ditangkapi atawa diunjuni.
Junaidi nang sudah mahir maunjun kada katinggalan jua umpat maunjun iwak. Inya mangaluarakan tantaran panjang gasan unjun pair iwak haruan.
“Amun wayahini iwak haruannya baluman tapi ganal lagi, jadi aku pakai kawat nang tahalus wan umpannya kodok halus jua,” ujarnya.
Junai mamadahakan wayahini bubuhan paujunan siap banar bacari iwak, tapi nang tabanyak pas hari parai, nangkaya hari Sabtu wan Ahad. Inya mamadahakan jua, amun nang bacari iwak nangkaya mahancau, mamasang lukah, banjur, tampirai wan malalangit banyak jua urangnya.
“Di wadah kami maujun di darat sana macam – macamai cara urang manangkap iwak, tapi pang buhan paunjunan nang liwar raminya,” ujar pakacil ngini.