Wayahini di Kabupatin Banjar urang rahatannya musim katam, marga ngitu urang rami batukar karung banih wan karambas, Sanayan (24/8/2020).
Saban musim katam urang rami batukar wadah gasan mambuat banih. Amun bahari urang wadahnya karung nang diulah tumatan purun wan ada jua karung guni. Tapi amun wayahini urang banyak batukar karung panyu atawa palastik.
Amun bahari rami urang batimbun banih di kindai, tapi wayahini kada lagi, sabab batuyuk-tuyuk didalam karung palastik.
Ujar Pakacil Usai di Sungai Tabuk, Kabupatin Banjar, tanyaman mambuat banih ka karung palastik. Sabab ujar sidin, kada ngalih mun handak manjamur, malabang, atawa mahilai, tinggal maluruk haja.
“Karung palastik ngitu rami ai urang bajual, imbah tu haraganya kada larang. Ada karung palastik bakas umpan hayam, bakas karung pupuk wan lainnya ai,” ujar Pakacil Usai.