Umai Bapala ! Musim kuruna umpan unjun nangkaya Lalak, kararawai, tabuan, kararangga, wan anak samut bakulut gatah, lingis ditukari buhan paunjunan, sampai ada nang kada kulihan (6/4/2020).
Tumatan baisukan Hari Ahad nang bajual umpan unjun di Sungai Tabuk, Kabupatin Banjar kada kasimbahan urang datang batukar umpan. Ada nang manukar anak lalak (kurat) gasan unjun pair, ada nang manukar anak kararangga, wan hahamburannya, anak tabuan, hulat bumbung, sampai nang bakulut bagatah.
Ribuan ikung lalak (kurat) lakas habis atawa lingis ditukari buhan paunjunan. Nang kaya ngitu jua umpan nang lainnya kada basisa. Buhan paunjunan ngini ada nang tuha, anum, kakanakan, babinian wan lakian sabarataan bacarian batukar umpan.
Ujar sapaliham bubuhan paunjunan, sudah lawas bagana dirumah pas musim kuruna, marasa pina dulak, jadi handak jua kaluar. Tapi kaluar lawan sorangan atawa kulawarga haja, kada bakumpul urang banyak atawa bahasa lautnya social distancing tatap dijaga.
Ujar saikung paunjunan, sidin kawa maunjun di sakitaran Kacamantan Aluh Aluh, Talaga Bauntung, pasalnya ditangati urang. Sapalihan bubuhan kampung jua managur wan manangati supaya kada takana panularan pirus kuruna.
“Kami paham haja pang gasan kabaikan jua buhannya managur wan manangati, jadi kami kada sarik. Padahal palawa nang handak diunjuni di parak rumah mintuha tatapai kada dibulihakan,” ujar sidin (kada ngaran sidin).
Imbah ditakuni barapa ikung nukar lalak (kodok), ujar sidin 30 ikung gasan babagi jua lawan kakawalan. Ditakuni kamana maunjun atawa palawa nang didatangi, sidin ngini bapadah di Simpang 5.
“Ini handak mamair ka Simpang 5, jalan Desa Kuliling Benteng,” padahkannya.