Bubuhan polisi matan polresta banjarmasin samalam marazia bubuhan preman atawa bambung- bambung wan tukang parkir liar nang ada dipasar sentra antasari atawa pasar hanyar. Pada razia ngitu labih dua puluh preman bahasil ditangkap wan dibawa pakai motor trak patroli polisi. Razia tarhadap bubuhan preman ngitu sampai haja jua pasar barang rombengan atawa pasar kasbah nang ada disakitar pasar hanyar ngitu. Imbah ngitu polisi manarusakan marazia preman wan tukang parkir liar nang ada di pasar ujung murung, tapi pinanya razia ngitu sudah bocor tadahulu sabab pas polisi sampai ka pasar ujung murung kadada lagi talihat bubuhan preman nang biasanya bhulu hilir di situ.
Ujar polisi razia preman ngitu dilakuakan supaya kaamanan masyarakat nang badagang wan bubulanja di pasar kada diganggui lagi olih bubuhan preman nang biasa mambajak atawa mamintai duit bapaksaan. Salanjutnya bubuhan preman nang sudah tatangkap di barikan nasehat supaya kada lagi mahaur wan mangganggui masyarakat nang handak nyaman badagang wan babulanja di pasar. Mun matan katarangan polisi sabahagian preman ngitu ada nang bakas palaku kajahatan ada jua nang jadi tukang parkir liar nang takadang mambajak atawa mamintai duit parkir bapaksaan