BARABAI – Gagara Sandal Gapit Gugur Ka Banyu, Talu (3) urang tinggalam di ranjah banyu landas tumatan Dam Sakutang atawa Batang Alai di Kabupaten HST, Arba (24/11/2021).
Hari Sanayan tadi (22/11/2021) dihabarakan talu urang hilang, karna tinggalam di Dam Sakutang atawa Batang Alai, Desa Labuhan, Kecamatan Batang Alai Selatan, Kabupaten HST. Imbah dihahar atawa dicarii sapajang aliran banyu, talu urang ngitu ditamuakan, tapi sudah kada banyawa lagi atawa maninggal dunia.
Ujar Kapala BPBD HST, Budi Haryanto nang paampihan ditamuakan ngarannya Beni Okto Sismanto alias Manto (46) sakitar pukul 16.50 Wita. Nang panambayan ditamuakan Jery (18) pukul 11.55 Wita, wan Arga (14) pukul 12.00 Wita.
Budi Haryanto maucapakan tarima kasih lawan bubuhan ragu panolong nang siang malam mancarii sampai dapat katalunya.
“Tarima kasih gasan sabaratan pihak nang kada tahu uyuh, nangkaya tumatan Basarnas, TNI/Polri, Rescue dari Banjarbaru, Sekumpul, Balangan, Amuntai, wan nang lainnya,” ujar Kapala BPBD HST, Salasa (23/11/2021).
Ujar habar, asal mula kajadian ngini, talu urang ngini maunjun di Dam Sakutang. Lalu sandal gapit si Jery tagugur ka banyu wan bausaha mambibit, tapi karna banyu landas datang bakakajutan inya hanyut. Malihat kawalnya nang timbul tinggalam tabawa banyu landas si Arga bausaha manulungi, tapi inya taumpat jua hanyut akibat kadadarasan banyu nang mangalir.
Malihat nang badua ngitu timbul tinggalam, maka si Manto bausaha manulunginya. Manto manyurungi paring gasan nang badua ngitu bapingkut, tapi Manto taumpat jua tacabur ka banyu nang kandas wan tinggalam.
Kadada habar apakah nang bataku ngitu bisa bakunyung (bananang) atawa kada.
Gambar : Istimewa