Bubuhan warga nang di kampung- kampung masih banyak haja nang tulak ka pasar pakai kapal klotok, nangkaya bubuhan di Sungai Tabuk, Kabupatin (4/7/2020).
Urang nang tulakan pas hari pasar nang sakali sapakan (seminggu) masihai rami pakai kapal klotok. Amun bubuhan pian ka Pasar Sungai Tabuk, Kabupatin Banjar pas Hari Sabtu, maka di Sungai Tabuk ngini jujuratan kapal klotok di Sungai Martapura ampah ka Pasar Sungai Tabuk.
Urang nang tulakan ka Pasar Sungai Tabuk ngini hampir barataan baisi kapal klotok sorangan atawa lainan taksi (Klotok pribadi). Ada nang datang ka pasar ngini handak tulak batutukar ada juang nang handak bajualan.
Ujar julak Anang Yani, amun bahari sakitaran 10 atawa 20 tahun lalu galiuran kapal klotok di Sungai Martapura. Apalagi mun rahatan hari pasar di Sungai Tabuk.
“Wayahini kada banyak kaya bahari lagi, sabab sudah banyak nang basisi sapida mutur wan jalan darat sudah kawa. Amun bahari matan dihandil- handil (sungai halus) ngitu kaluaran jukung atawa klotok, karna kadada jalan darat,” ujarnya (4/7/2020).
Suriani, sopir klotok matan Desa Lok Buntar mamadahakan, inya mambawa bubuhan kaluarga ka Pasar Sungai Tabuk liwat Sungai Martapura. Ujarnya singhaja tulak ka pasar ngini pakai kapal klotok, sabab sambil mahangkut kaluarga wan buah nyiur gasan dijual.
“Amun mahangkut nang banyak ngini urangnya kada kawa pakai sapida mutur, apalagi di Desa Lok Buntar jumbatan gantung haja, kada kawa bamutur,” ujarnya.
[penci_related_posts title=”Berita Menarik Lainnya Klik Saja Dibawah Ini” number=”6″ style=”grid” align=”none” displayby=”recent_posts” orderby=”random”]