Maharagu Itik Wan Mahintaluakan Pilihan Bubuhan Warga di Margasari, Kabupatin Tapin gasan bacari rajaki sahari-hari (25/1/2020).
Wayahini urang di Banua kita di Kalimantan Salatan harus bapintar-pintar bausaha bacari nafkah gasah mahidupi kaluarga. Pasalnya luang gasan bagawi ngalih wan halin banar, jadi harus baakal-akal saurang haja lagi bacari usaha.
Gasan ngitu, sabahagian warga di Kabupatin Tapin di Margasari umpamanya bubuhannya wayahini cangkal bausaha baharaguan itik. Maharagu itik ngini gasan mahintaluakan haja, wan hintalunya dijual.
Abdul Aziz (48), nang maharagu 175 ikung itik mamadahakan, itik nang baumur 5 bulan sudah mulai bahintaluan. Jadi ujar Aziz, sabaluman itik bahintaluan, bapintar-pintaran maharagunya, umpamanya haja ukara maumpani atawa mambari makaninya.
“Ulun maumpani itik matan lagi halus sampai ganal bahintaluan lawan paya. Puhun rumbia disini banyak disini, jadi imbah di tabang, ditatak-tatak wan diparut jadi am paya gasan umpan itik ngini,” ujar sidin.
Julak Aziz ngini mamadahakan jua supaya itik hancap wan nanar bahintaluan umpannya kada paya haja, tapi dikambuhi jua umpan Par-el. Haraga sakarungnya Par-el ngini Rp 350 ribu gasan talu hari haja, imbah tu habis manukar baasa pulang.
“Sahari itik nang 175 ikung ngini hintalunya paling sadikit 110 bigi. Haraga jualnya antara Rp 2000 – 2200 bairingan ganal halusnya,” pandir sidin.
Itik nang diharagu bubuhan Margasari ngini Itik Bali, lainan itik Halabio. Sabab, Itik Bali takuat wan talawas umurnya bahintaluan.
“Itik Bali ngini kada pamati diharagu. Lawan mun bahintalu taracap wan talawas, salisihnya kakurang labih talu bulan daripada Itik Halabio,” jar Julak Abdul Aziz.
Mahran, nang bagaduhan itik bali gasan mahintaluakan mamadahan jua, itik nang diharagu kada bulih balapas. Sabab, amun balapas itiknya, maka pacangan maucir bahintalu.
“Amun maharagu itik gasan mahintaluakan, mustinya bakurung supaya kada maucir kasitu kasini bahintalu. Parjanjian di kampung ngini apabila ada hintalu itik tadapat diluar pada kurungan, maka bebas haja nang ampunnya,” jar Marhan.
Bubuhannya nang bagaduhan itik di Margasari ngini kada maharamakan hintalu itik gasan baulah bibit, tapi manukar haja.
“Baluman suah kami manarai nang maharamakan hintalu itik gasan baulah bibit anak itik. Tahu am mun kaina dadudi,” pandir Pakacil Mahran ngini.