AMUNTAI – Bubuhan masyarakat di Amuntai, Kabupaten HSU ampih ragu wan rasa kada parcaya lawan KPK, sabab Bupati HSU Abdul Wahid ditatapakan jua sabagai tasangka, Jumahat (26/11/2021).
Sabaluman Bupati HSU Abdul Wahid ditatapakan sabagai tasangka kasus kurupsi banyak karaguan bubuhan masyarakat lawan KPK. Sabab, pas OTT KPK ngitu Bupati HSU kada taumpat, wan babarapa kali pamariksaan nang langsung di Kantur KPK di Jakarta, tatap kada ditatapakan tasangka wan kada ditahan.
Karna kalalambatan atawa kalawasan ngitu banyak masyarakat nang kada sabar wan maraguakan gawian buhan panyidik KPK. Tapi pas Hari Kamis (18/11/2021) KPK manatapakan Bupati HSU Abdul Wahid sabagai tasangka wan langsung mangurungnya di Rutan KPK di Jakarta.
Imbah manatapakan Bupati HSU Abdul Wahid sabagai tasangka, banyak nang mangira KPK bulikan, tapi sakalinya pamariksaan wan panyalidikan babangat. Umpamanya haja rumah Sekda HSU Muhammad Taufik digulagai habis wan habarnya kadapatan banyak duit wan amas.
Kada sampai disitu haja pamariksaan KPK malalar sampai ka Katua DPRD HSU Almien Ashar Safari atawa anak Bupati Abdul Wahid. Batarus pulang KPK mamariksa babarapa urang bibinian nang diduga urang parak banar lawan Bupati HSU ngitu.
KPK jua mangiau bubuhan kontraktor sampai kapada urang nang jadi kaparcayaan Abdul Wahid. Ada jua bakas Katua RT 08 nang imbah dipariksa KPK jadi garing lalu maninggal dunia, Kamis (25/11/2021).
Malihat gawian KPK di Kabupaten Hulu Sungai Utara ngini sapalihan masyarakat mambari dukungan banar. Talihat banar dukungan masyarakat gasan nang handak malingisakan korupsi di HSU sampai ka akar-akarnya.
“Kami wayahini dukung banar wan KPK, mun sabaluman Bupati HSU ditangkap wan ditatapakan tasangka, kami sawat rasa pina ragu lawan bubuhan KPK. Tapi imbah ditangkap, ampihai buhan kami ragu lawan KPK,” ujar warga Amuntai.