BAHASA BANJAR BUDAYA TIPS & TRIK

Warga Sungai Tabuk Mati Ditimbak Patir

Martapura : Warga Sungai Tabuk mati ditimbak patir. Warga Handil Buluan, Desa Gudang Hirang ngini ditimbak patir pas rahatan di galangan pahumaan, Sabtu (20/4/2019).

Ujar bubuhan Warga Handil Buluan, Anang mangganii abahnya si Kamarudin bahuma batanam banih. Pas hujan labat wan bapatir banar nang badua baranak ngini ampih batanam wan handak bulik ka rumah.

Ujar Anang Fery, Madan atawa Anang (23) ngitu sudah dipadahi abahnya bahaya patir. Gasan ngitu sidin mamadahi supaya si Madan ngitu kada maingkuti parang pas bulikan.

“Tapi ujar abahnya disahuti Anang, mun ciri ulun mati ditimbak patir kada maingkuti parang gin sama haja. Nah kada lawas imbah ngitu ditimbak patir banaran inya,” ujar Anang Fery.

Anang Fery mamadahakan jua nang inya tahu, karena ditimbak patir ngitu topi si Madan Rabit, wan parang nang inya pingkuti takipai, malacung jauh.

Padahal nang ulun tahu, Madan ngitu jar Fery, orangnya baik banar wan basupan santun banar urangnya. Imbah ngitu pulang imbah katam kaina handak kawin.

“Rancana lun dangar habar imbah katam kaina inya handak kawin wan urang Barabai,” jar si Anang Fery.

Kapolsek Sungai Tabuk AKP Idit Aditya mambujurakan ada warga nang maninggal dunia karna ditimbak patir ngitu. Kajadiannya, hari ini Sabtu, sakitar pukul sawalas siang

“Korban maninggal dunia imbah sampai ka Puskesmas Sungai Tabuk. Korban ngitu warga Jalan Martapura Lama,Handil Buluan, Gudang Hirang,” ujar sidin.

Leave a Reply

Your email address will not be published. Required fields are marked *