Liwar ! Musim korona wayahini, sakalinya imbih dirikin urang nang basarakan wan jadi balu babanyak, Arba (12/8/2020).
Amun pian bajinguk ka kantor pangadilan agama di Indonesia, pian hanyar tahu, bahwa urang maajukan talak atawa bapisahan laki-bini babanyak. Padahal wayahini lagi musim korona, tapi malahan nang basarakan.
Kada usah jauh-jauh nang kaya si jawa, nang parak haja nangkaya di Kapuas, urang nang basarakan imbah dirikin-rikin batambah jua di musim korona ngini.
Tumatan Bulan Januari sampai ka Bulan Agustus 2020 ngini haja ada 285 gugatan nang masuk ka Pangadilan Agama Kapuas. Padahal di tahun 2019 kada sabanyak ngitu, yaitu 253 haja.
Jumlah urang nang basasarakan ngitu dipadahakan Panitera Muda Hukum Pengadilan Agama Kuala Kapuas, Pakacil Junaidi.
“Ada nang basarakan atawa jatuh talak gagara hual laki -bini, karna ekonomi, ada urang katiga, laki kada mambari nafkah, wan laki tulak kadada habarnya lagi,” ujar Junaidi.
Junaidi mamadahakan jua, nang banyak minta talak atawa bapisahan ngini kabanyakannya nang bini.
“Tumatan 285 nang maurus talak, 217 buting biniannya nang handak minta talak. Mun nang sisanya 46 buting laki nang handak manyarak bini,” ujar Junaidi.