Liwar Ratiknya Sungai Martapura Di Banjarmasin Jadi Pampan Karena Kabanyakan Ratik Nang Larut Wan Sangkut di Jumbatan, Karna Ngitu Mangganggu Lalulalang Kapal Kalotok (2/1/2020).
Ratik kayu, paring wan ilung manyasaki Sungai Martapura nang ada di Banjarmasin. Sungai Martapura ngini jadi pampan kada kawa dilalui kapal kalotok, jukung, wan sapid bot. Karna ngitu Pamarintah Kota Banjarmasin mangiau wan manyuruh Pasukan Turbo matan Dinas PUPR mambungkas ratik nang maulah pampan sungai ngini.
Ujar Kapala Pasukan Turbo PUPR Kota Banjarmasin, Muhammad Syamsuddin HS, ada 57 urang anak buahnya nang bagawian mambungkas ratik supaya kada pampan lagi. Amun nang maulah ngalih jar julak Syamsudin, yaitu kabanyakan ratiknya.
“Nang mahibaki ngini ratik akar kayu nang ganal-ganal, wan paring. Nang diatas ngini ilung haja,” ujar sidin (2/1/2020).
Kapala Pasukan Turbo ngini mamadahakan jua, pampan nang ada sudah biasa, misalnya haja di bawah Jumbatan Antasari, wan Jumbatan Pasar Lama.
“Amun dalam satahun ngitu ada sapuluh sampai 12 kali Sungai Martapura di Banjarmasin ngini pampan. Nang utamanya dibawah jumbantan ngitu tadi,” jar julak ngini.
Muhammad Syamsuddin mangisahakan, ratik nang maulah pampan Sungai Martapura ngini kada buhannya angkat wan hangkut, tapi dilabuhakan haja.
“Ratik nang liwar kababanyakan ngini kada kami hangkut, tapi kami labuhakan haja kahilir. Mudahan haja kaina sakitar pukul talu sudah ampih pampan sungai ngini,” ujar julak Muhammad Syamsudin.
Sungai Martapura di Banjarmasin nang pampan ngini maulah wisata susur sungai taganggu. Puluhan kapal kalotok nang biasanya saban hari rami mahangkut bubuhan turis di Siring Piere Tendean wan Manara Pandang kada kawa bagarak.