Kantor Berita Kalimantan
Home » Pacangan Calun Kapala Dairah Manginamat
BAHASA BANJAR OPINI POLITIK

Pacangan Calun Kapala Dairah Manginamat

images 24 01
images 24 01

Pacangan Calun Kapala Dairah Nang Manginamat Manimbai Anduk Putih di Pilkada 2020 di Kalsel (17/1/2020).

Pas partai politik mambukakan lawang gasan pandaftaran Pacangan Calun Bupati, Walikota, Gubnur di Banua kita ngini, maka rami urang nang maambil furmulir pandaftaran. Tapi imbah ngitu sapalih haja nang malangkapi wan mambulikakan furmulirnya.

Sapalihan jua pacangan calun kapala dairah di pilkada 2020 di Banua kita ngini, imbah sidin malangkapi wan mambulikakan furmulir hinip haja lagi. Kadada tadangar habar lagi, bapasang sapanduk kadada, sauting- uting kadada jua baliho.

TINGGALAM BATU

Ada pacangan calun bupati, walikota, Gubnur nang kada tadangar lagi habarnya. Mun paribahasa Urang Banjar Tinggalam Batu, kadada lagi buriniknya.

Pacangan calun kapala dairah nang tinggalam batu ngitu, kikira napa masalahnya? Umpat baramian hajakah, mamasang banjur hajakah, habis palumbarankah atawa manginamat.

Amun manginamat pinanya pas haja pang amun sudah barikin bujur-bujur. Umpama imbah dirikin-rikin atawa dihitung mun tarus bakajal maju, duit pacangan tiis pasti, tapilih baluman tantu. Jadi amun sidin nang manginamat pasti kada bahapal haja.

Pacangan calun kapala dairah nang manginamat sudah ada haja di Banua kita ngini. Sidin kada jadi maju di pilkada 2020 alias manimbai anduk putih, sabab sidin sadar, amun sudah talanjur tacalubuk ngalih tatarikannya.

Baluman suah tadangar habar urang umpat pilkada wan manang, tapi kada sing kaluaran duit gasan biaya atawa ongkos. Karna ngitu, urang nang kawa umpat pilkada harus baisi mudal, paling kada gasan ongkos kahulu-kahilir bakampanye.

Ujar habar ada jua pacangan calun kapala nang bapiragah baisi duit banyak. Padahal baharap duitnya ada nang mamudali, mahutangi, imbah ngitu bayarnya lawan janji, pabila manang digantii wan paruyek A,B,C sampai Z.

Untung haja pang ada nang manginamat, sidin kada jadi bacalun wan ampih muyak kahulu-kahilir nang mahabisakan palumbaran wara.

Berita Terkait

Leave a Comment

KANTOR BERITA KALIMANTAN
KBK - Kantor Berita Kalimantan Info Khas Kalimantan