MARTAPURA – Gagara banyu ba’ah di di pahumaan bubuhan sapalih petani di Kabupaten Banjar tapaksa manugal atawa manaradak di higa kartak gasan maulah anak banih, Sanayan (27/12/2021).
Sapalihan pahumaan di Kabupaten Banjar kacalapan, karna ngitu ngalih bubuhan petani maulah anak banih. Sabab, anak banih nang sudah talanjur ditanam taumpat rusak wan matian karna kalawasan tarandam. Imbah tarandam anak banih ngitu dimakan pulang oleh kalambuai.
“Kami sudah maulah anak banih wan ditanam di pahumaan, tapi rusak imbah kalawasan tarandam banyu ba’ah wan dimakan kalambuai. Karena ngitu kami tapaksa manugal atawa manaradak gasan baulah anak banih nang hanyar,” ujar Haji Syahrul Warga Desa Pejambuan, Kecamatan Sungai Tabuk.
Manurut julak ngini, gasan bibit baulah anak banih nang hanyar ngini, bubuhan petani dibantu buhan Dinas Pertanian Kabupaten Banjar.
” Bujurai wayahini banyu ba’ah atawa calap pahumaan kami, makanya kami manugal dihiga kartak ngini. Tapi, palingan sabulan anak banih ngini mulai ganal, lalu awal Bulan Februari kawa kami batanam, karna banyu sudah surut,” jar sidin mamadahakan lagi.
Kauntungan manaradak di higa kartak, salain kada calap, ujar Haji Syahrul, yaitu hayam, burung, wan tikus kada mamakani bibit nang gasan maulah anak banih.
“Urang nang lalu lalang di kartak maulah tikus, hayam, wan burung kada wani baparak. Apalagi nang lalu mutur wan sapida mutur, nangkaya diburu haja, jadi takutan kalo,” ujar petani Desa Pejambuan ngini.
Di higa, Haji Syahrul ngini ada jua Murjani petani nang sudah manugal atawa manaradak wan anak banihnya sudah mulai tumbuh. Sidin ngini rahatan mamupuki anak banih nang hanya mulai tumbuh.
“Ulun pakai pupuk nang tamurah haja gasan manabah kasuburan anak banih. Pupuk nang ulun pakai ngini pupuk mutiara nang harganya Rp 13 ribu sakilonya,“ ujar sidin sambil maudak pupuk ka dalam banyu di ember.
