BAHASA BANJAR BUDAYA TIPS & TRIK

Rami Batanai Banyu Hujan Gara-Gara Banyu Liding Mati

Martapura : Rami Batanai Banyu Hujan Gara – Gara Banyu Liding Mati. Tabulik kaya jaman bahari pas musim kumaru kangalihan banyu, lalu amun ada hujan rami batanai banyu, Sabtu (20/4/2019).

Pipa liding ampun PDAM Intan Banjar nang ganalnya kaya drum miris wan pacah. Karna ngitu sudah 3 hari ngini 9 ribu palanggan kangalihan banyu barasih di 3 kacamatan di Kabupaten Banjar.

Ujar Dirut PDAM Intan Banjar Syaiful Anwar, 3 kacamatan nang kada tasalurakan banyu liding, Gambut, Sungai Tabuk, wan sabahagian Kartak Hanyar.

“Kami mambaiki siang wan malam supaya pipa nang rusak ngitu lakas diganti,” ujar sidin.

Lokasi pipa nang pacah rahatannya dibaiki ngitu ada di Jalan Gubernur Syarkawi atawa jalan tol. Andakannya nang jauh matan jalan ganal wan dipadang balukar babanyu mangalihakan bubuhan nang manggawi.

Ujar Kacab II PDAM Intan Banjar Bayu, sakitaran 9 ribu langganan banyu barasih nang lidingnya mati.

“Mudahan haja kawa lakas tuntung, jadi nyaman kada ngalih lagi lawan banyu,” ujar Bayu.

Karna kangalihan kada kolehan banyu barasih, maka pas hari hujan banyak palanggan banyu barasih nang batanai banyu hujan. Ujar Aci Aisyah, amun baharap banyu sumur nang ada banyunya kada barasih lawan pina ba bau.

“Kami batanai banyu hujan haja nah, malaranai gasan babasuh wan batatapas. Apalagi lun dangar habar banyu liding mati bisa sampai samingguan” ujarnya.

Leave a Reply

Your email address will not be published. Required fields are marked *